LAOAG CITY – Nagsagaba ti sugat ken gasgas iti nagduduma a paset ti bagi dagiti uppat nga indibidual a pakairamanan ti dua nga ubbing nga agpada nga agtawen ti pito iti napasamak a disgrasya iti paset ti Barangay Baay iti ciudad ti Batac.
Daytoy ti inbatad ni Police Lt. Col. Adrian Gayuchan, ti chief of police iti ciudad ti Batac.
Inlawlawag ni Gayuchan a basar iti imbestigasyon da, nasapgud ti maysa nga Innova iti likud a paset ti sarsaruwen na a tricycle bayat a dagitoy ket agpada nga agpapa-amyanan.
Gapu iti napasamak ket naidungpar ti tricycle iti steel signages a nangitunda ti pannakapurwak dagiti nakalugan a nangitunda ti panagpasar da ti sugsugat ken gasgas iti bagida idinto a ti driver ti Innova ket saan a naan-ano.
Naitaray dagiti biktima iti Mariano Marcos Memorial Hospital and Medical Center iti ciudad ti Batac, ken kalpasan ti pannakataming dagiti sugatda ket nakarwar da metlaeng a dagus.
Segun ken ni Gayuchan, dagiti biktima ket agpapada a residente iti nadakamat a barangay idinto a ti nangiturong ti Innova ket residente iti Barangay Caraitan iti ili ti Badoc.
Mainaig iti daytoy, inpakaammo ni Gayuchan a nakapagsasarita metten dagiti biktima ken ti driver ti Innova seknan iti nasao a pasamak.
Basar iti nagbalin a palawag ti driver ti Innova ket nairidep na isut gapuna a nasapgud na ti tricycle.
