LAOAG CITY – Nakairekord ti probinsya ti Ilocos Norte ti uppat a panagpakamatay ita a bulan ti Oktubre.
Ti kaudian nga insidente ket napasamak iti ili ti Vintar no sadinno ti biktima ket agtawen ti 78, naasawaan ken maysa a mannalon.
Segun kenni Police Captain Jofel Pascual, ti chief of police ti Philippine National Police iti ili ti Vintar, inbitin ti biktima ti bagi na usar ti tali iti puon ti kayo nga asideg iti pagtaengan da.
Inbatad na a basar iti imbestigasyon da ket maipagarop a depresyon ti rason no apay nga inaramid na daytoy gapo ta rumrumuar nga addaan ti cancer.
Kabayatanna, nairekord met iti ili ti Solsona ti maysa nga insidente ti panagpakamatay.
Kuna ni Police Captain Randy Damo, ti chief of police ti Philippine National Police iti ili ti Solsona, ti biktima ket agtawen ti 43 a lalaki.
Inlawlawag a basar iti imbestigasyon da ket rumrumuar a depresyon met laeng ti maipagarop a rason ti panagpakamatay ti biktima.
