LAOAG CITY – Natiliw dagiti uppat a tattao ken pito a manok a para pallot babaen ti inyuswat nga operasyon ti Ilocos Norte CIDG nga indaulwan ni Chief Inspector Nelson Apostol idiay Barangay Baresbes iti ili ti Dingras.
Nabigbig dagitoy a da Artemio Palin, Joel Dumalo, John Michael Baysac ken Junis Babao, agpapada a residente iti nasao nga ili.
Naamoan nga agpapada dagiti uppat a naglikudan da a makipal-pallot da kabayatan a naiyuswat ti operasyon.
Segun kenni Palin, mapan na laeng kuma singiren ti nakautangan na ngem nairaman a natiliw.
Inbatad met ni Baysac a mapan kuma alaen ti motorsiklo na idi ginammatan dagiti kameng ti CIDG.
Naamoan a naiyuswat ti panagpapallot sakbay ti panangrugi ti pyesta ti barangay intono Enero 24.
