LAOAG CITY – Inanunsio ni Presidente Ferdinand Marcos Jr. a naan-anayen a nasebseban ti uram iti Navotas landfill kalpasan ti sumagmamano a lawas nga operasion ti gobierno ken pribado a sektor.
Segun iti Presidente, nagtinnulong dagiti bumbero, lokal a gobierno, environmental teams, Department of Public Works and Highways (DPWH), Department of Tourism (DOT) ken dagiti pribado a kompania tapno malappedan a kumaro ti uram ken maprotektaran dagiti residente iti aglawlaw ti landfill.
Nangipaay ti technical assistance pakairamanan ti gobierno ti Japan.
Iti baet a kontroladon ti uram, kuna ti Presidente nga agtultuloy latta ti 24 nga oras a panagbantay iti lugar.
Karaman ditoy ti panangtingiting iti kalidad ti angin ken danum, thermal scanning tapno masigurado nga awanen ti nabatbati pay nga apoy ken health monitoring kadagiti residente ken responders.
