LAOAG CITY – Naarestar ti maysa nga US Citizen kalpasan a pinagsasawan, intudo-tudo ken tinungpa na dagiti sumagmamano a kameng ti pulisya iti paset ti Barangay 13, Magat-Salamat ditoy ciudad ti Laoag.
Nabigbig ti suspek a ni Philip Abad Baloran, agtawen ti 63, US citizen, residente iti Kaunakakai, Hawaii ngem agdama nga agnanaed iti nadakamat a barangay.
Segun ken ni Police Lt. Col. Amador Quiocho, ti chief of police ditoy ciudad ti Laoag, immuna a nakariri ti suspek ni Police Corporal Junel Allagadan Lombo, agtawen ti 30, naasawaan, kameng ti PNP-Sarrat ken residente iti Barangay 30-B, Sta. Maria ditoy ciudad ti Laoag.
Iti imbestigasyon,, kabayatan ti panagdaldalyasat ni Lombo iti lugar kadwa na ti anak na ket kinarit ti suspek isut gapuna a nagsardeng ken dinamag na no ania ti problema daytoy.
Nupay kasta, ad-adda laeng a nagprobokar ti suspek ken pinagsasawan na pay ti pulis ti agkakaalas a sarita iti baet a nagpabigbig daytoy a maysa a pulis.
Gapu iti daytoy, nagpatulong ni Lombo iti PNP-Laoag, ken iti papan panagresponde da Police Corporal Jonathan Forral Cardona, agtawen ti 38, naasawaan, residente iti Barangay 2 iti ili ti Bacarra ken ni Police Corporal Brodlee Agbayani Villanueva, agtawen ti 28, baro ket saan latta a nagsardeng ti suspek gapu ta pinagsasawan ken tinungpa na pay dagitoy.
Inbatad ni Quiocho a pilaan da ti reklamo a direct assault ti suspek tapno adda ti pagmenna-mennaan na.
Iti agdama, nagtalinaed ti suspek iti kustodyar ti PNP ditoy ciudad ti Laoag.
Naamoan a nabartek ti suspek idi napasamak ti insidente.
Kabayatanna, ginandat ti Bombo Radyo Laoag a kasarita ti nasao a suspek ngem nagkedked ken saanna a kayat ti makisarita a nasayaat.
