LAOAG CITY – Nangipasa ti United States House of Representatives ti maysa a resolusion a mangibilbilin ken ni United States President Donald Trump nga isardeng ti aniaman a tignay iti militar kontra iti Iran malaksid no adda ti pammalubos ti Kongreso.
Nakagun-od ti gakat ti 214 a butos a pabor kontra iti 208 no sadinno nga uppat a Republican ti kimmanunong kadagiti Democrat.
Nupay kasta, kalpasan laeng ti sumagmamano nga oras, inbasura ti United States Senate ti agsina ngem kapada a gakat iti butos a 49-47.
Pabor ni Republican Senator Susan Collins kadagiti Democrat idinto a nagbutos met ni Democrat Senator John Fetterman kaduana dagiti Republican kontra iti resolusion.
Inpila ni Representative Pramila Jayapal, maysa a Democrat manipud iti Washington, ti resolusion iti Kamara de Representantes a mangibilbilin iti Presidente nga isardeng ti panagusar ti armada ti Amerika kontra iti Iran aggingga awan ti pammalubos manipud iti Kongreso.
Ikonkonsiderar daytoy a simboliko nga addang ken awan ti insigida nga epekto iti agdama nga operasion ti militar.
Inpakita ti nagsina a panagbutos ti dumakdakkel a panagamak dagiti agpanpanday linteg manipud iti agsinnungbangir a partido iti lumawlawa a riribok iti Middle East.
Kabayatanna, nagballaag ni Presidente Trump ti nakarkaro a tignay iti militar kontra iti Iran ken dagiti kaalyado daytoy nga Houthi kalpasan ti panangatake iti dua a Saudi oil tanker iti Red Sea idinto nga agtultuloy ti panangiwayat ti airstrike ken missile attacks iti nagbaetan ti Estados Unidos ken Iran.
