LAOAG CITY – Inrakurak ni United States President Donald Trump nga ag-test-da ti nuclear weapons kas kadagiti dadduma a pagilian.
Nupay kasta, nagkedked ni Trump nga ibuksilan no karaman kadagiti plano ti panangpabettak ti nuclear warhead.
Saanen a nangipaay pay ti ad-adu pay a detalye ni Trump ngem inpasiguradona a mangiwayatda ti nuclear testing kas kadagiti ar-aramiden ti sabali a pagilian.
Mainaig iti daytoy, inbilin ni Trump iti napalabas a bulan iti United States military nga insigida a rugian manen ti proseso ti testing nuclear weapons kalpasan ti 33 a tawen.
Kabayatanna, inaramid ni Trump ti surprise announcement kabayatan a nakalugan iti Marine One helicopter-na tapno makipagkita ken ni Chinese President Xi Jinping para iti trade-negotiating session idiay Busan, South Korea.
