LAOAG CITY – Inanunsio ni United States President Donald Trump nga inyalud-odna ti ceasefire iti nagbaetanda iti Iran kalpasan a nakisarita ti Pakistan kabayatan a maiyur-uray pay ti maysa nga “unified proposal” manipud iti Tehran.
Inbatad ni Trump, agtalinaed a nakaiyalud-od ti ceasefire agingga a makaipasa ti Iran ti proposal-da ken kalpasan ti negosasion iti aniaman a wagas.
Iti baet daytoy, agtaltalinaed nga awan ti kasiguradoan ti maipapan iti kinakappia kabayatan nga umadanin ti panagngudo ti dua a lawas a ceasefire.
Agpangpangadua pay laeng ti Iran no makipaset daytoy iti baro a panagsinnarita ken dinakamat ti maipagarup nga “unacceptable actions” ti Amerika pakairamanan ti agtultuloy a blockade iti Strait of Hormuz.
Kinanselar ni United States Vice President JD Vance ti naikeddeng a panagbisita iti Pakistan para iti maikadua a tukad ti negosasion idinto a dagiti dadduma pay nga opisial ti Estados Unidos ket adda iti konsultasion pay laeng no kasano a pagsasaritaan ti peace talk.
Kabayatanna, agtultuloy ti panangikagumaan dagiti opisial ti Pakistan nga umannugot ti dua a pagilian iti katulagan tapno maliklikan manen ti gubat.
Iti agdama, agtaltalinaed a nakalukat ti posibilidad ti baro a negosasion wenno kumaro manen ti tension kabayatan a maiyur-uray ti desision ti Iran ken Estados Unidos.
