LAOAG CITY – Nagballaag ni United States President Donald Trump a dadaelen ti Amerika dagiti planta ti kuriente ti Iran no saanna daytoy a naan-anay a lukatan ti Strait of Hormuz iti uneg ti 48 nga oras.
Ti naiget a pangta ni Trump ket kagiddan ti nagbalin a rakurakna iti kallabes mainaig iti in-inot a panagsardeng ti gubat ngem bimmabara manen ti tension kalpasan kadagiti nagsasaruno a panangatake.
Basar iti report, nangiwayat ti Iran ti dua a long-range ballistic missiles nga adda ti kaadayo nga uppat a kilometro nga agturong iti United States-United Kingdom military base iti Diego Garcia idiay Indian Ocean.
Segun ken ni Israeli military chief Eyal Zamir, daytoy ti umuna a gundaway a nagusar ti Iran ti nasao a klase ti missiles nga adda ti kabaelanna nga umabot agingga kadagiti kabisera iti Europa kas iti Berlin, Paris ken Rome.
Tinamaan dagiti missile ti Iran dagiti siudad ti Dimona ken Arad idiay Israel a nakasugatan ti dinosdosena nga indibidual pakairamanan dagiti ubbing.
Kabayatanna, sipud nangrugi ti opensiba ti Estados Unidos ken Israel idi Pebrero 28, sumurok dua a ribu ti natay idiay Iran idinto a 15 met ti nairekord a pimmusay idiay Israel.
