LAOAG CITY – Nagpangta ni United States President Donald Trump a mangipataw ti 100% a taripa kadagiti negosio ti Canada no makipag-trade deal ti pagilian iti China.
Saan a nalawag no ania a deal ti dakdakamaten ni Trump iti post-na iti social media.
Inrakurak ni Prime Minister Mark Carney iti napalabas a lawas ti strategic partnership iti China no sadinno nga immannugot a kissayan dagiti taripa.
Ginutigot ni Carney dagiti dadduma pay a “middle powers” nga agkakadua iti baet ti economic coercion ti “greater powers” uray saanna a dinakamat ti nagan ni Trump.
Simmungbat met ni Trump kadagiti rakurak iti bukudna a panagbitla iti simmaruno nga aldaw nga inbatadna nga agbibiag ti Canada gapu iti Estados Unidos.
Inikkat ni Trump ti maysa nga imbitasion para iti Canada a makipaset iti baro a Board of Peace.
Inpakaammo ni Trump ti post-na iti social media a no ti ammo ni Carney ket pagbalinenna ti Canada a maysa a ‘Drop Off Port’ para iti China a mangipatulod kadagiti negosio ken produkto iti Estados Unidos, daytoy ket dakkel a biddotna.
Ikagkagumaan ti Canada a pagdudumaen ti negosio nga umadayo iti Estados Unidos, ti kadakkelan a kasosyo daytoy iti negosio kagiddan ti kinaawan ti kasiguradoan a gapu iti on-again-off-again a taripa ni Trump.
Iti babaen ti katulagan a nagbaetan da Carney ken Chinese President Xi Jinping iti napalabas a lawas, ibaba ti China dagiti singir iti canola oil ti Canada manipud iti 85% agingga iti 15% inton Marso idinto a ti Canada ket maikkan ti buis dagiti Chinese EV iti rate ti pagilian a 6.1% a bimmaba manipud iti 100%.
Kabayatanna, ti deal ket nakita kas maysa a naisangsangayan a balligi kalpasan kadagiti tawen a pilit a relasion ken tit-for-tat a taripa ken mabalin a makakita ti ad-adu a panagpuunan ti China iti Canada.
