LAOAG CITY – Inrakurak ni United States President Donald Trump ti panangraut ti Amerika kadagiti tallo a nuclear sites ti Iran.
Daytoy ket pakairamanan ti Fordo, Natanz ken Esfahan.
Amin nga eroplano ket addan iti ruar ti Iran.
Binomba ti Estados Unidos ti Fordo ken dadduma pay a nuclear sites ti Iran.
Naammoan a nangipatulod ti Washington ti B-2 stealth bombers iti United States island ti Guam a kakaisuna nga aircraft a kabaelanna nga agkarga ti nasao a bomba a nangdadael iti Fordo.
Mainaig iti daytoy, inbatad ti Iran’s foreign minister a ti pannakibiang ti Estados Unidos iti rinnupak ti Israel ken Iran ket nakarisrisgo.
Daytoy ti nagbalin a rakurakna kabayatan ti kaaddana idiay Istanbul tapno makipagkinnita iti Presidente ti Turkey.
Kabayatanna, manamnama a mangiparuk-at ti televised address ni Trump manipud iti White House.
