LAOAG CITY – Agpada a nakasangpeten idiay Alaska nga isuda United States President Donald Trump ken Russian President Vladimir Putin para iti maiyuswat a panagtaripnong.
Personal a naginnalamano ti dua a lider apaman a nakababa dagitoy iti eroplano sakbay a maisayangkat ti taripnong.
Basar iti White House, saanen nga agbalin nga one-one meeting daytoy gapu ta makadua iti taripnong ni Trump da Secretary of State Marco Rubio ken special envoy Steve Witkoff.
Maaddaan ti post-meeting lunch nga atendaran da Rubio, Witkoff, Treasury Secretary Scott Bessent, Commerce Secretary Howard Lutnick, Defense Secretary Pete Hegseth ken Trump’s chief of staff Susie Wiles.
Manamnama a maysa kadagiti talantanen ti dua a lider ket ti pannakaipasardeng ti gubat iti nagbaetan ti Russia ken Ukraine.
Immunan a ginutigot ti European Leader a nasken a mairaman iti taripnong ni Ukrainian President Volodymyr Zelensky.
Innayon ni Trump a no agballigi daytoy a taripnong da ken Putin ket mangisayangkatda manen ti taripnong kaduana ni Zelensky.
