LAOAG CITY – Inrakurak ni United States President Donald Trump nga agtaripnongda ken ni Russian President Vladimir Putin mainaig iti rinnupak iti Ukraine idiay Alaska inton Agosto 15.
Segun ken ni Trump, daytoy ket kalpasan a napaay a nakitaripnong ni Putin kenkuana idi Biernes maipanggep iti ceasefire-da iti Ukraine.
Mainaig iti daytoy, basar iti Kremlin nga agsagsaganada met para iti panangimbitarda ken ni Trump iti Russia.
Inbatad ni Yuri Ushakov, Assistant ni Putin a ti sumaruno a summit ket maiyuswat iti Moscow ngem awan pay ti komento ti White House maipanggep iti daytoy.
Naammoan a ti naudi a Presidente ti Estados Unidos a bimmisita idiay Russia ket ni Barack Obama a nagatendar iti G20 summit iti St. Petersburg idi 2013.
Kabayatanna, kinumpirmaran ti Kremlin ti plano nga agbiahe ni Putin idiay Amerika para umuna a face-to-face negotiations-da ken ni Trump sipod idi 2019.
