LAOAG CITY – Nagpangta ni United States President Donald Trump a mangipataw ti taripa kadagiti produkto a sumrek iti Estados Unidos manipud kadagiti 14 a pagilian pakairamanan ti Japan ken South Korea mangrugi inton Agosto.
Plano ti White House a mangipatulod ti surat kadagiti sumagmamano a lider ti pagilian gapu iti dandanin a panagngudo ti 90 nga aldaw a pawayway para iti agresibo a taripa.
Inrakurak ni Trump ti pannakaipatungpal ti 25 a porsiento a buis kadagiti produkto manipud idiay South Korea ken Japan.
Inbatadna a ti pannakaipatungpal ti pannakaipataw ti baro a buis inton Agosto 1.
Mainaig iti daytoy, nangipatulod ti Japan ti sumurok $148bn a produkto idiay Estados Unidos iti napalabas a tawen a maibilang ti Amerika kas maikalima a kadakkelan a supplier ti panag-import kalpasan ti European Union, Mexico, China ken Canada kas maibasar iti United States trade data idinto a ti South Korea ket adda met iti top 10.
Plano ni Trump ti 40% a taripa kadagiti produkto manipud idiay Myanmar ken Laos, 36% a taripa kadagiti produkto manipud idiay Thailand ken Cambodia, 35% a taripa kadagiti produkto manipud idiay Serbia ken Bangladesh, 32% a taripa kadagiti produkto manipud idiay Indonesia, 30% a taripa kadagiti produkto manipud idiay South Africa ken 25% a taripa kadagiti produkto manipud idiay goods Malaysia ken Tunisia.
Kabayatanna, inpakaammo ni White House press secretary Karoline Leavitt a maipatulod dagiti surat kadagiti maseknan a lider kadagiti nasao a pagilian kadagiti sumarsaruno nga aldaw.
