LAOAG CITY – Pinirmaanen ni United States President Donald Trump ti executive order para iti rebranding wenno panangsukat ti nagan ti Pentagon kas Department of War.
Inaramid ti Presidente ti Estados Unidos ti panangpirma iti Oval office iti White House idi Biernes, Septiembre 5, oras ditoy Pilipinas.
Segun ken ni Trump, ad-adda a tugma ti baro a nagan ti departamento gapu iti agdama nga estado ti lubong ken inpannakkelna nga addaanda ti kabilegan a militar iti intero a lubong.
Iti nasao nga Executive Order, mapalubosan ti Secretary of Defense, Department of Defense ken subordinate officials nga usaren ti maikadua nga awag kas Secretary of War, Department of War ken Deputy Secretary of War iti official correspondence, public communications, ceremonial contexts ken non-statutory documents iti uneg ti executive branch nga insigida a rinugian nga inpatungpal dagiti opisial daytoy.
Naibilin kadagiti amin nga executive departments ken agencies a bigbigen ti baro a secondary titles iti internal ken external communications ken namandar ni Defense Secretary Pete Hegseth a mangirekomendar kadagiti tignay, agpada iti lehislatura ken ehekutibo a permanente nga awagan ti United States Department of Defense kas United States Department of War.
Maobserbaran a binalbaliwan ti Pentagon officials ti signage iti ruar ti opisina ni Hegseth pakairamanan ti website ti departamento nga adda ti nakaikabil nga United States Department of War iti ngato ti Department of Defense.
Inbatad ni Hegseth ti pannakasukat iti nagan ti departamento ket saan laeng mainaig iti “renaming” no diket mainaig daytoy iti “restoring” no sadinno ti militarda ket saan laeng nga agpokus iti depensa no diket iti opensa ken mangipasimudaag ti revamp iti ahensia ti panagadu ti warriors saan laeng ti defenders.
Kabayatanna, saan a masinunuo iti agdama no kasapulan pay a dumalan iti Kongreso tapno permanente a masukatan ti nagan ti United States Defense department.
