LAOAG CITY – Ikonsiderar ti Hamas ti baro a proposal ti Egypt nga agpanpanawagan iti grupo a wayawayaanda dagiti 33 nga hostage kasukat ti temporario a panagsardeng ti panangraut ti Israel iti Gaza.
Iti baro a proposal ket addaan ti dua a paset daytoy a ti umuna ket ti pannakawayawaya dagiti 20 agingga 33 a kasukat ti pannakawayawaya dagiti Palestino a nakabalud ken maikadua ti pannakaisubli ti kinaulimek iti Gaza.
Iyur-uray pay laeng ti Israel ti sungbat ti Hamas no sadino makitaripnong dagitoy kadagiti mediator manipod iti Egypt ken Qatar.
Inawagan met ni United States Secretary of State Antony Blinken a ti baro a proposal ket “extraordinarily generous iti paset ti Israel.
Kunana a napateg nga agsungbat dagus ti Hamas ken mangnamnama ni Blinken nga agbalin nga husto ti nagbalin a desisionda.
Maipalagip nga inlungalong ti Hamas ti permanente a ceasefire ken full Israel withdrawal manipod iti Gaza ti nasken a paset ti katulagan ngem nagpatangken ti Israel nga itultuloyda ti panangraut iti Gaza agingga a saan a mawayawayaan dagiti hostage ken mapatalaw dagiti Hamas militants.
