LAOAG CITY – Pinalubosan ti United States Supreme Court ti administrasion ni United States President Donald Trump nga ipatungpal ti pagalagadan a mangipawil kadagiti aplikante ti United States passport a pilien ti kinatao basar iti gender identity-da nga imbes a ti pasaporte ket nasken laeng a maibasar iti sex assigned at birth.
Nairuar ti desision kabayatan nga agtultuloy ti class action lawsuit a mangkukwestionar kadagiti pagannurotan.
Basar iti korte, ti panangipakita ti sex iti birth certificate iti pasaporte ket saan a manglablabsing iti ”equal protection principles,” ken maibilang laeng daytoy nga historical fact.
Nag-dissent met ti tallo a liberal justices nga isuda Ketanji Brown Jackson, Sonia Sotomayor ken Elena Kagan nga inrakurakda a ti pagannurotan ket mangitunda kadagiti marginalized groups, ti scrutiny ken humiliation partikular kadagiti transgender Americans.
Nadakamat a binaliktad ti pagalagadan ti dekada a nakadawyan ti United States State Department sipod idi 1992 a mapalpalubosan ti sex designation iti pasaporte uray sabali pay ti sex assigned at birth basta ti aplikante ket addaan ti medical documentation.
Iti babaen ti administrasion idi ni dati nga United States President Joe Biden, manipud idi 2021 ket mapalpalubosan ti self-selection ti sex marker pakairamanan ti third option nga “X” para iti nonbinary, intersex ken gender non-conforming nga aplikante.
Basar kadagiti nagreklamo, ti pagannurotan ket mangipapaay laeng ti rason kadakuada iti harassment, extra security screenings ken posible a detainment ken mangikkat kadagiti karebbenganda a mabalin a mangitunda iti misidentification wenno kinaranggas.
Maipalagip nga iti administrasion ni Trump ket agtultuloy nga itar-target-na ti karebbengan dagiti transgender Americans iti babaen kadagiti nagduduma nga executive orders pakairamanan ti pannakaipawil ti transgender iti militar ken panangkissay iti pundo para iti LGBT-related research iti National Institutes of Health.
