LAOAG CITY – Inlawlawag ni United States Vice President JD Vance a saan a makigubgubat ti Estados Unidos iti Iran.
Daytoy ket kagiddan ti inaramid a panangaprobar ni United States President Donald Trump a bombaen ti nuclear sites ti Iran.
Inbatad ti United States Vice President a saanda a makigubgubat iti Iran gapu ta ti laeng target-da ket ti nuclear program.
Kunana a nagbalin a naannad ni Trump iti nasao a desision a bombaen ti nuclear sites ti Iran.
Inpettengna a mapagtalkanda dagiti impormasion a makalkalap ti intelligence community-da.
Innayonna a napateg ti nasapa a panangraut ken saanen nga itantan gapu ta ad-adda a makaitunda daytoy ti nakaro a riribuk .
