LAOAG CITY – Nakasaganan ti kampo da United States Vice President Kamala Harris ken dati a United States President Donald Trump para iti umuna a debateda.
Maangay daytoy iti alas 9 ti bigat inton Miyerkules iti oras ti Pilipinas iti National Constitution Center idiay Philadelphia.
Kabayatan ti panagsagsagana ni Harris, kinasaritana ni United States President Joe Biden ken dati a United States First Lady Hillary Clinton nga immunan a nakasango ni Trump kadagiti debate.
Agsagsagana met ni Harris iti aniaman nga insulto a mabalin nga ipuruak kenkuana ni Trump.
Ngem nu pay kasta, patien ti kampo ni Harris nga addanto desision dagiti maibilang nga undecided voters iti nadakamat a debate.
Iti biang ni Trump, kinunana a saanen a kasapulan ti aniaman a pormal a panagsagana gapu ta addan mitingna kadagiti senior advisers, policy experts ken allies.
Inpakaammu ti campaign spokesperson ni Trump a ni Jason Miller ti sumagmamano kadagiti topiko nga ipuruakda ken ni Harris.
Karaman ditoy ti di umiso a panangtamingna iti beddeng ti United States ken Mexico, Illegal Immigration, panagikkat dagiti soldado ti United States a nakadestino idiay Afghanistan ken ti panagbannayad ti ekonomia ti nasao a pagilyan.
