LAOAG CITY – Kinondenar ni US Vice-President Kamala Harris ti kaado dagiti natay a sibilyan gapu iti inyuswat ti Israel nga air a pinuntirya na ti school building idiay Gaza.
Inbatad ti direktor ti ospital a nasurok a 70 a tattao ti natay iti nasao a pasdek a pagnanaedan dagiti naibakwit a Palestinians.
Inpaganetget ni Harris nga ado unayen dagiti natay a sibilyan kagiddan ti panagpanawagan na manen para iti “hostage deal” ken ceasefire.
Immunan nga inpetteng ti Israeli military spokesman a ti al-Taba’een school ket agserserbi kas Hamas ken Islamic Jihad military facility, banag a naglikudan met ti Hamas.
Kabayatanna, immanugot ti Israel iti lungalong nga agatendar da iti baro a ceasefire talks, ngem awanen ti naipaay pay a naan-anay a detalye seknan iti daytoy a banag.
