LAOAG CITY – Binalakadan ti Malacañang ni Vice President Sara Duterte a basaen ti desisyon ti Korte Suprema iti kaso nga Avelino v. Cuenco tapno maaddaan ti ammo kadagiti pagannurutan ti senado aglalo iti isyu ti panagpili ti liderato na.
Daytoy ti nagbalin a sungbat ni Presidential Communications Office (PCO) Undersecretary Claire Castro kalpasan nga inrakurak ni Duterte a masapol nga agsasarita ti amin a 24 a senador tapno masolbar ti isyu iti liderato ti Senado, karaman dagiti aglemlemmeng ken nakabalud.
Segun ken ni Castro, saan a maiparbeng ti lungalong ti bise presidente gapu ta dagiti nakabalud nga agpanpanday linteg ket adda iti babaen ti hurisdiksyon ti korte ken saan a ti Senado, isut gapuna a saan da a basta makaatendar wenno makabotos.
Innayon ti opisyal a kas maysa nga abogado ket rumbeng laeng a pamilyar ti bise presidente kadagiti legal nga hurisprudensya seknan iti daytoy.
Inlawlawag met ni Castro a no kayat ni Duterte a makasubli iti Senado ni Senador Ronald “Bato” dela Rosa tapno agatendar kadagiti sesyon ket nasaysayaat no gutiguten ken allukuyen daytoy kas ti inaramid nga addang ni Senador Alan Peter Cayetano.
