Ngimmato iti P15.02 trillion ti utang ti Pilipinas iti panaglippas ti bulan ti Abril iti baet ti panagkapsot ti balor ti Philippine peso basar iti Bureau of Treasury.
Nangatngato daytoy ti P91.5 billion wenno 0.61% manipod idi Marso ngem nagtalinaed a nababa iti nairekord a P15.18 trillion idi Pebrero.
Manipod iti pakabuklan nga utang ti gobierno, dumanon iti P4.71 trillion wenno katukad ti 31.36% a pangruar nga utang idinto a 68.64% wenno katukad ti P10.31 trillion ti pang-uneg nga utang.
Nanayunan ti P31.01 billion ti pang-uneg nga utang idi Abril kalpasan a nangiruar ti gobierno ti ad-adu a securities.
Nakanayun pay ti P3.78 billion ti panagkapsot ti piso iti foreign-currency-denominated domestic debt.
Maipalagip a dakkel ti nautang ti pagilian iti maudi a paset ti termino ni Presidente Rodrigo Duterte tapno mapundoan ti pandemic response daytoy ken masustentoan ti infrastructure project ti administrasion.
