LAOAG CITY – Ninayunan ti gobierno ti vacation service credits (VSCs) dagiti mangisursuro manipod 15 nga aldaw napagbalin a 30 nga aldaw.
Daytoy ket basar iti Department of Education (DepEd) Order No. 13, s. 2024 wenno ti Revised Guidelines on the Grant of VSCs for Teachers a pinirmaan ni Education Secretary Sonny Angara.
Basar iti Department of Education, ti vacation service credits ket ti leave credits a naurnong dagiti mangisursuro para kadagiti serbisyo nga inaramid dagitoy kadagiti aktibidad nga otorisado dagiti proper authorities iti summer, Christmas vacation, weekends, holidays ken uray iti teaching overload.
Naipalaon pay iti pammilin a dagiti mangisursuro nga addan ti maysa a tawen na iti serbisyo, karaman dagiti baro a mangisursuro nga addaan ti appointments a naiparuk-at, awan pay ti uppat a bolan sakbay ti umuna nga aldaw ti serrek iti pagadalan ket entitled iti 30 a VSCs ti kada tawen.
Innayon ti DepEd a ti maysa iti improvement ti nabaliwan a guidelines ket ti probisyon iti panagbilang iti service credits a sobra iti regular nga oras iti trabaho.
Malaksid iti daytoy, dagiti mangisursuro nga agaramid ti nayun a teaching-related duties kas ti panagatendar iti training sessions iti weekends wenno holidays, agar-aramid ti remedial classes, election-related duties, teacher-parent conferences ken home visits iti ruwar ti regular nga oras iti trabaho ket mabenepisyaran iti baro a guidelines.
Agepekto daytoy 15 nga aldaw sipud naaprubaran ken naipublikar iti website ti Department of Education.
