LAOAG CITY – Dinayaw ni National Task Force Against COVID-19 Chief Implementer and Vaccine Czar Secretary Carlito Galvez ti panagballigi ti 3-day national vaccination drive ditoy Ilocos Norte.
Inbatad ni Gob. Matthew Marcos Manotoc a maragsakan iti panangdayaw ti Vaccine Czar secretary iti nagbalin a resulta ti naisayangkat a panagbakuna ditoy probinsia ken mangipakita a napnek ti sekretaryo.
Inpakaammo ti gobernador nga umabot iti innem a pulo ribu a residente ditoy probinsya ti nabakunaan sipud idi Nobiembre 29 agingga iti Disiembre 1 ita a tawen.
Mainaig iti daytoy, kunana ni Manotoc nakapatpateg ti naisayangkat a panagbakuna iti intero a pagilian para iti al-alisto a pannakagun-od ti herd immunity.
Maipalagip a naisayangkat ti 3-day vaccination drive iti nagduduma a lugar wenno establisimiento ditoy probinsia kas kadagiti pagadalan, ospital, mall, fastfood chain ken dadduma pay.
