LAOAG CITY – Napagbalinen a naan-anay a linteg ti kontrobersyal a vape bill.
Daytoy ti kinumpirmaran ni Press Secretary Trixie Cruz-Angeles.
Ti addang ket mangipaay kadagiti pagannurotan iti panagangkat, panagaramid, panaglako, panagempake, panagiwaras, panagusar, ken komunikasion kadagiti produkto ti vape ken dagiti nobela a produkto ti tabako.
Iyakarna pay dagiti regulatory powers kadagiti produkto manipud iti Food and Drug Administration iti Department of Trade and Industry (DTI).
Immun-una iti daytoy, nagpanawagan da senador Pia ken Alan Peter Cayetano, karaman dagiti sumagmamano a medical groups ken ni Presidente Ferdinand Marcos Jr. nga ibasura na ti nailungalong a linteg.
Inpetteng ni Senador Pia Cayetano a ti Sin Tax law ket umanayen tapno ma-regulate ti panagusar ti vape ditoy pagilyan.
Kabayatanna, dagiti dadduma nga healthcare professionals ken propesors ket nangiyebkas iti pammati a ti addang ket mabalin a makatulong a mangpabassit kadagiti nakaro a peggad iti salun-at ken mabalin a mangisalakan iti biag ti nasurok a 16 a milyon a pilipino nga agsigsigarilyo ken addaan ti risgo nga agsakit ken matay gapu iti sigarilyo.
Mainaig iti daytoy, agpada a kinontra ti Department of Health ken ti Department of Education ti pannakaipasa ti nasao a gakat gapu ta mangdadael iti agdama a nailian a paglintegan, paglintegan iti regulasyon ken ti panagusar iti vape, ken dadduma pay a produkto a tabako.
Nagballaag met ti DOH a ti pannakaipasa ti nasao a linteg ket mangitunda kadagiti agtutubo iti panagusar da pay iti dadduma a makadadael iti salun-at kas iti arak, marijuana, ken dadduma pay nga illegal a droga.
