LAOAG CITY – Saan pay a masinunuo ti Vatican no inton ano a makaruar iti ospital ni Pope Francis.
Addan ti dua a lawas a nagtalinaed iti Gemeli hospital ti agtawen ti 88 a Santo Papa ken agtultuloy a makilablaban iti double pneumonia.
Basar iti Vatican a nagbalin a napintas ti kasasaad ti Santo Papa ken naimas ti turogna kadagiti naglabas a rabii.
Makapagna daytoy iti kuartona ken dadduma ket makatugaw pay ken makapangan ti normal.
Nakakabit pay laeng ti supplementary oxygen daytoy manipud iti agongna.
Immunan nga inbatad dagiti doktor a naaddaan ti improvements ti chest CT scan ti Santo Papa ken normal ti kondision ti barana.
Malaksid iti daytoy, nakita pay nga adda ti panagbalbaliw ti bato ti Santo Papa.
Nagbalin a prone laeng iti lung infection ti Santo Papa gapu ta nakaptan daytoyen ti pleurisy idi kaubinganna ken naikkaten ti maysa a paset ti barana.
Naammoan nga idi 2021 ken 2023 idi dimmalan daytoy ti intestinal surgery.
