LAOAG CITY – Agduduma ti opinyon ti publiko mainaig iti rekomendasyon ti Inter-Agency Task Force for the Management of Emerging Infectious Diseases (IATF) a boluntaryo laengen ti panagusar ti face mask kadagiti pampubliko a lugar.
Inbatad ni Virgilio Buado, maysa nga aglaklako ti face mask iti San Nicolas Public Market, saan nga umanamong iti daytoy a rekomendasyon gapu ta ad-adda manen a maapektaran iti negosyo da no sadinno a kalpasan a bimmaba ti kaso ti covid-19 ket bassiten ti malaklako da.
Gapu iti daytoy, kuna ni Buado a no mabalin ket saan a maikkat gapo ta saan metlaeng a covid-19 virus ti masalakniban ti face mask no di ket dagiti pay nagduduma a sakit gapu iti air pollution.
Innayon na a saan kuma a maminpinsan a maipawil iti panagusar ti face mask gapo ta isu laeng ti ammo da pangalaan da ti pagbiagan da iti inaldaw.
Kabayatanna, pabor ni Barangay kagawad Glenn Basilio iti Brgy. Cabungaan ditoy ciudad ti Laoag gapu ta nasaysayaat no isardengen ti agsuot ti face mask kalpasan a bimmaban ti kaso ti nasao a sakit ditoy pagilyan.
Maiyur-uray ti possible nga panangiparuk-at ni Presidente Ferdinand “Bongbong” Marcos Jr. ti executive order no aprubaran na ti rekomendasyon ti Inter-Agency Task Force for the Management of Emerging Infectious Diseases wenno saan.
