LAOAG CITY – Kinumpirmaran ti Venezuela a na-detect-da a nagpatayab ti Amerika ti 5 a combat aircraft nga asideg iti Caribbean coast-da.
Inladawan ni Venezuelan Defense MInister Vladimir Padrino ti nasao nga insidente kas probokasion ti Estados Unidos a mangitunda iti nailian a seguridad iti risgo.
Basar iti inparuk-at nga statement ti Venezuelan government, nakita ti United States fighter jets iti distansia a 75 a kilometro manipud iti coastline wenno kabaybayan, sumagmamano a milya ti kaadayo manipud iti standard territorial waters a masansan nga adda iti 12 nautical miles manipud iti kabaybayan.
Timmayab ti United States F-35 fighter jets nga adda ti kapaspas a 400 knots ken adda ti kangato a 35,000 feet.
Na-detect dagitoy ti air defense systems ti Venezuela iti paset ti Maiquetia flight information region.
Naammoan a ti pannaka-detect ti United States fighter jets ket iti baet ti kumarkaro a tension iti nagbaetan ti Amerika ken Venezuela kagiddan ti panangipatulod ti immunan a sumagmamano nga United States warships iti Caribbean nga inpetteng ti Amerika a maysa a misyon tapno labanan ti drug trafficking ngem mamati ti Venezuela a target daytoy a balbaliwan ti agdama a rehimen.
Maipalagip nga iti kallabes laeng ket tinarget ti United States strikes ti uppat a bangka a nakatayan ti sumurok maysa a dosena a mapapati a drug traffickers iti baet nga awan ti inruar a konkreto nga ebidensia ti Amerika a kriminal dagiti tinarget-da.
