LAOAG CITY – Simmangpeten idiay New York ti Venezuelan President Nicolás Maduro kalpasan nga inarestar dagiti suldado nga Amerikano iti pagtaenganna iti Caracas.
Basar iti report, maysa a puraw nga FBI Boeing 757 ti nag-landing iti Stewart Air National Guard Base iti agarup alas-4:30 ti malem, American time.
Kalpasan ti sumagmamano a kanito, ngimmato dagiti pulis iti eroplano ken kalpasan ti sumurok-kumurang 30 a minuto, sumagmamano nga indibidual a mapapati nga isuda Maduro ken ti asawana a ni Cilia Flores pakairamanan dagiti sumagmamano nga opisial, ti nakita ti in-inot a bumabbaba manipud iti eroplano.
Mainaig iti daytoy, inarestar da Maduro ken Flores iti kabisera ti Venezuela idi Biernes ti rabii ken insigida nga inyakar idiay Estados Unidos mainaig kadagiti kaso nga adda ti pakainaiganna iti drug trafficking.
Rumrummuar nga immuna a naikabil ti agasawa iti Puerto Rico sakbay a naan-anay a timmayab a nagturong idiay New York City.
Nakita ni Maduro ken ti asawana a sumrek iti maysa nga eroplano iti Ramey Base a masarakan iti uneg ti Rafael Hernández International Airport iti Aguadilla.
Kinumpirmaran met ti Mayor ti Aguadilla a ni Julio Roldan iti social media a maipagrup a dimmalyasat iti siudadda ti Venezuelan leader.
Awan pay ti opisial a rakurak manipud iti gobierno ti Venezuela wenno ti Estados Unidos mainaig iti nasao nga insidente.
