LAOAG CITY – Inadmitir ni Vice Gov. Matthew Marcos Manotoc a mapagsasaritaanen ti pamiliada mainaig iti 2028 elections.
Segun kenkuana, adayo pay ti 2028 ngem arig dandani metten a madanon daytoy a tawen isut gapuna a masapul a pagpanunotanda dagiti nasken nga aramiden ti pamiliada maipanggep iti lubong ti pulitika.
Inbatadna a maudin a termino ni Ilocos Norte 2nd District Rep. Angelo Marcos Barba rason a masapul a mapagnunumoanda dagiti sumaruno nga addang nga aramidenda.
Inlawlawagna a maysa kadagiti pamiliada ti apektado ti political dynasty ngem inpasingkedna a maipangpangruna latta ti pagsayaatan para kadagiti umili.
Kunana a maibilang man ti pamilia Marcos nga adda iti political dynasty ngem adu met ti pakakitaan ken nagbaliwan kabayatan ti panagturayda ditoy probinsia.
