LAOAG CITY – Inlawlawag ni Vice Gov. Matthew Marcos Manotoc nga awan ti planona a patarayen ti asawana a ni Miss Earth 2014 Jamie Herrell para iti 2028 Election.
Segun ken ni Manotoc, saanda nga usaren a dummy wenno proxy ti asawana iti lubong ti pulitika.
Nupay kasta, inpasingkedna a tumulong ti asawana kas maysa a beauty queen kas iti panangitandudo kadagiti nagduduma a programa ken proyekto iti pamilia Marcos.
Kunana nga adda dagiti proyekto ti asawana ditoy probinsia kas ti fire trees ken forestation aglalo ket maysa daytoy a Miss Earth.
Inlawlawagna a gagangayen para ken ni Jamie kas maysa nga asawa ti pulitiko a makilangen-langen kadagiti umili.
Inpakaammo pay ni Vice Gov. Manotoc a tultulungan isuna ti asawana maipapan kadagiti ideya iti turismo, marketing ken dadduma pay.
Maipalagip a nakikallaysa ti anak ni Senadora Imee Marcos a ni Ilocos Norte Vice Gov. Matthew Marcos Manotoc iti Cebuana beauty queen a ni Miss Earth 2014 Jamie Herrell idi Enero 9 ita a tawen iti maysa a seremonia a naisayangkat iti Cebu Metropolitan Cathedral.
