LAOAG CITY – Saan a pabor ni Vice Governor Cecilia Araneta Marcos ti pannakaipadalan ti preventive suspension kadagiti mayor ditoy probinsya.
Daytoy ti nagbalin a reaksyon ti bise gobernador kalpasan nga adda ti rekomendasyon ti Sangguniang Panlalawigan mainaig ti 3 a kaso administratibo no sadinno a kangrunaan kadagiti mairekreklamo ket mayor iti nagduduma nga ili.
Inbatadna a para kenkuana ket no mabalin ket saan a maipadalan iti preventive suspension dagiti local chief executives ita a panawen ti pandemya.
Inpasingkedna a kasapulan isuda dagiti constituentsda nangruna ita nga isuda ti mangmanehar ti agdama a mapaspasaran a pandemya gubuay ti COVID-19 aglalo ita a ngumat-ngato ti kaso ti virus ditoy probinsya.
Kunana a mas maawatanna no dagitoy ket maipadalan iti preventive suspension no ti panawen ket saan a pandemya.
Nupay kasta, innayonna a ti nakadepende iti desisyon ti SP ti pannakatratar dagiti kaso administratibo.
Maipalagip nga idi laeng kalman adda ti rekomendasyon ti Sang Panlalawigan mainaig kadagiti 3 a kaso administratibo a pakairamanan ditoy ti Pagaling kontra kenni San Nicolas Mayor Alfredo Valdez, Perez kontra ken ni Pagudpud SBM Garvida ken Solsona SBM Pascua et al kontra ken ni Mayor Joseph De Lara.
