LAOAG CITY – Kiniddaw ni Vice Mayor Albert Chua iti Philippine National Police iti ciudad ti Batac a sangwen ken trataren da koma a dagus dagiti reklamo a maidatag iti nasao a kwerpo ti pulisya.
Inbatad ti bise mayor nga aniaman a klase ti reklamo, mabalin a sabali ti gandat na personal wenno aniaman ti gagem na ket rebbeng laeng a trataren ti Philippine National Police iti ciudad ti Batac.
Kuna pay ni Chua nga awan koma ti tumpuwar a problema gapu iti saan a pannakaikaso dagiti maidatag a reklamo babaen ti panangtratar a dagus ti Philippine National Police.
Innayon na a rumbeng a maala a dagus dagiti impormasyon manipod kadagiti agrekreklamo.
Mainaig iti daytoy, inpaganetget ni Vice Mayor Chua a masapol nga agtalinaed ti panagtalek ti umili iti Philippine National Police babaen ti panangipaay da ti napintas a serbisyo iti publiko ken napintas a pannakikadwa kadagiti pada nga adda iti serbisyo.
Maipalagip nga inimbitaran ni Vice Mayor Chua dagiti mangidadaulo ti nagduduma nga ahensya ti gobierno, pakairamanan ti Philippine National Police, Bureau of Fire protection, Bureau of Jail Management and Penology ken Department of the Interior and Local Government iti Sang Panglungsod session hall tapno iyam-ammo ti bagbagida ken idasar da dagiti ipatungpal da a programa ken proyekto a makatulong para iti ad-adda pay a panagprogreso ti ciudad ti Batac.
