LAOAG CITY – Kalikagum ni Vice Mayor Carlos Farinas a maaddaan ti Philippine Science High School ditoy siudad ti Laoag.
Segun kenkuana, daytoy ket kalpasan a mariparna nga awan pay ti naipasdek ditoy probinsia maidasig kadagiti kaparanget a probinsia kas iti Ilocos Sur ken Cagayan.
Inbatadna a napagbalin idi ti amana a ni dati a Mayor Michael Farinas ti nasao a pagadalan babaen iti pinirmaan idi ni dati a Presidente Rodrigo Duterte idi 2017 a napagbalin a linteg a Republic Act No. 10965 a maestablisar daytoy.
Inlawlawagna a kumpleto met aminen dagiti pasdek ngem maiyur-uray laengen ti Internal Rules and Regulation tapno naan-anayen a maipatungpal ti nadakamat a pagadalan.
Kunana a nagipasada pay idi ti maysa a resolusion idi napalabas a tawen babaen ken ni Vice President Sara Duterte tapno maipalagip ken maiplastar ti pormal a pannakalukat daytoy.
Inpalgakna a tinawen nga adda ti mailatlatang a pundo para iti nasao a pagadalan ngem masayang laeng gapu ta saan met pay a nangrugi a nagoperar.
Nupay kasta, kunana a naisimpa metten ti Internal Rules and Regulation iti Office of the Vice President idi pay Hunio iti napan a tawen.
Mainaig iti daytoy, inpakaammona a saan a naikoordinar daytoy a banag ken ni Dr. Joann Corpuz, ti Schools Division Superintendent ditoy siudad ti Laoag isu nga awan ti ammona maipapan ti proseso iti daytoy.
Inbatadna nga apaman a naan-anay a maluktan ti nasao nga eskuela a masarakan iti Brgy. Vira ditoy siudad ti Laoag ket maksayan pay dagiti adu nga estudiante a mapmapan iti Ilocos Norte National High School ken Ilocos Norte College of Arts and Trades.
Babaen iti daytoy, maidiaya ti dua a section para iti Grade 7 no sadino mabalin a maakomodar dagiti 80 nga agad-adal agingga nga in-inot a manayonan ti klasrum ken dagiti estudiante.
Kunana nga adda ti naawatda a surat a mangkidkiddaw iti lokal a gobierno ditoy siudad ti Laoag a mapundoan ti 2.9 a milyon a pisos para iti panangrugida inton Hulio agingga Disiembre ita a tawen.
Inlawlawagna nga adda ti maiyuswat nga entrance examination dagiti sumrek iti nasao a pagadalan.
Innayonna nga adda ti dormitoryo dagiti estudiante iti uneg ti pagadalan no sadino ket adda kadakuadan no agtalinaedda ditoy wenno agawid iti pagtaenganda.
