LAOAG CITY – Inlungalong ni Presiding Officer/ Vice Mayor Rey Carlos Farinas ti pannakaaramid ti ordinansa a mangmandar kadagiti kameng ti Philippine National Police nga agbantay kabayatan iti session iti Sangunaing Panglungsod ditoy ciudad ti Laoag.
Daytoy ket kalpasan ti napasamak a pammaltog idiay Aklan a nakatayan ti bise mayor.
Inbatad na a makaalarma daytoy a pasamak aglalo ket saan da met amin nga ammo ti kinatao dagiti sumsumrek iti session hall.
Kunana a napintas no adda dagiti madutukan a kameng ti pulisya nga agbantay kabayatan iti session iti konseho tapno maliklikan ti aniaman a saan a nasayaat a pasamak.
Segun iti bise mayor, saan a maliklikan a naruay dagiti sensitibo a banag a mapagsasaritaan kabayatan ti sesyon isut gapuna a kasapulan da met ti agsakbay.
Kabayatanna, inyendorsar ti bise mayor daytoy a banag iti Committee on Peace and Order tapno insigida a maiyaramidan iti ordinansa.
Maipalagip a natay ni Vice Mayor Julio Estolloso iti Aklan iti uneg a mismo ti opisina na kalpasan a pinaltugan ni Sangguniang Bayan Member Mihrel Senatin gapu iti maipagarop a saan da a panagkinnaawatan.
