LAOAG CITY – Inbatad ni Vice President Sara Duterte nga adda ti posibilidad a saanen a makasubli ti ama na a ni dati a Presidente Rodrigo Duterte iti Pilipinas kalpasan ti pannakaarestar na nga iti agdama ket nakabalud iti International Criminal Court Detention Center idiay The Hague, Netherlands.
Inpetteng ti bise presidente a kasayaatan no agmove-forward laengen imbes nga itultuloy nga ipeksa ti marikrikna a pungtot gapu ta saan metlaeng a mapagsungbat ti gobierno.
Iti baet nga awan ti ar-aramiden dagiti otoridad iti Pilipinas para iti pannakaisubli ti ama na iti pagilian, inbatad ni Vice President Duterte nga itultuloy ti kampo da ti agbiruk ti wagas tapno agbalin a possible ti panagsubli pay ti dati a presidente.
Kabayatanna, patien ni Vice President Sara a saanna man a maibaga a traydor ngem sigurado nga adda dagiti kakadwa da iti nagtalinaedan da a kwarto idi napan idiay Hongkong ti nagidandanun iti ruwar wenno siasinno man a nagidandanunan da ti aniaman a napagsasaritaan da iti uneg.
