LAOAG CITY – Nagtalinaed ti takder ni Vice President Sara Duterte a saan a bumaba iti pwesto na.
Sungbat daytoy ti bise presidente iti panawagan dagiti agpanpanday linteg nga agresign laengen no saanna a maannong a naimbag ti trabaho na kas maikadwa a kangatoan nga opisyal iti pagilian.
Namonganay ti panawagan dagiti agpanpanday linteg kalpasan a nagkedked ti bise presidente a mangdependar ti pondo ti opisina na para iti 2025.
Inpalgak ti bise presidente a saan nga agsungbat iti ‘Young Guns’ gapu ta kasapulan na laeng ti sumungbat iti 32 milyon a nangibotos kenkuana.
Innayon na a saan a pumanaw iti pwesto na gapu ta inpatugaw dagiti tattao iti pammati da a kabaelan na nga aramiden dagiti trabaho na para iti pagsayaatan ti pagilian.
Ti ‘Young Guns’ ket grupo dagiti miembro ti kamara de representantes nga agtawen ti 40 agpababa a kaadoan kadagitoy ket umuna a termino da paylaeng kas agpanpanday linteg.
Gapu iti saan a panagatendar ni Duterter iti budget deliberations para iti pondo ti opisina na iti 2025 ket binaliwan ti kamara de representantes ti schedule na
Immunan a kinissayan ti House Appropriations Committee ti inlungalong a pondo ti Office of the Vice President iti 700 a milyon a pisos manipod iti nailungalong a P2-billion.
