LAOAG CITY – Inrakurak ni Vice President Sara Duterte nga agpaidasig daytoy iti kina-Presidente ditoy Pilipinas inton 2028 elections.
Ti nasao nga anunsio ket naiparuk-at iti baet kadagiti kontrobersial pakairamanan ti tallo nga impeachment complaints a naipila kontra kenkuana iti House of Representatives, a kontrolado dagiti kaalyado ni Presidente Ferdinand Marcos Jr.
Iti kallabes, nairubuat idiay Cebu ti “Tatay Digong for Inday Sara Movement 2028” a gagem nga ipakita ti suporta iti kandidaturana ken panangdayaw iti panangidaulo ti amana a ni dati a Presidente Rodrigo Duterte.
Iti baet kadagiti karit, nagtalinaed a nangato ti nagan ni Duterte kadagiti survey kas maysa kadagiti frontrunners para iti eleksion.
Ti kandidaturana ket manamnama a mangitunda ti nabara a laban iti pulitika nangruna iti baet kadagiti kaso a sangsangoen ti amana iti International Criminal Court (ICC).
