LAOAG CITY – Maysa a naidumduma nga obra ti bimmida iti benneg ti musika ken sining kalpasan nga inpakita ti Japanese glass manufacturer nga HARIO ti kaunaan a playable glass violin iti intero a lubong ken certified daytoy ti Guinness World Records.
Ti violin ket saan a pang-display laeng. Iti baet a naaramid iti mabuong a materyal, pudno daytoy a violin ken mabalin a patukaren nga us-usto.
Kalpasan ti sumurok 60 a tawen a panagsanay iti glass-blowing, pinadas ti HARIO a nagaramid ti maysa a banag a saan laeng a mangipakita ti kinalaing iti craftsmanship no di ket makapabilib pay iti baro nga henerasion.
Saan a nagbalin nga alisto ti proyekto. Malaksid a narisgo, kumplikado pay ti sukog ti violin.
Kinasapulanda a siguradoen a pantay ti kinapuskol ti sarming tapno mapagtalinaed a playable daytoy. Iti baet a sumurok-kumurang a 1,300 a gramo, nadagdagsen daytoy ti agarup 600 a gramo maidasig iti nakadawyna a violin ngem saan a nagbalin a lapped daytoy iti kalidad ti tukar daytoy.
Basar iti report ti Sankei Shimbun, ti tukar ti glass violin ket arig nagtipon a tradisional a koky maysa a Japanese string instrument ken ti violin no sadinno a nalawlawag.
Kas panangbigbig iti balligi iti napartuatda, pinadayawan ti Guinness World Records ti opisial a sertipikasion ti HARIO.
Daytoy ket maysa a pammaneknek a ti sining ken siyensia ti glass-making ket kabaelanna a makigiddan iti moderno a musika.
Iti agdama, agbalor ti 5.5 million yen wenno katukad ti P1.3 million ti glass violin ti HARIO.
