LAOAG CITY – Ado latta dagiti mabalin a mangsappuyot iti panagtupada iti mismo a galyera iti baet nga adda ti agraira nga E-Sabong no sadinno a 24 nga oras ti operasyon na.
Daytoy ti pammati ni Vice Mayor Windell Chua iti ciudad ti Batac kalpasan nga inpalubusen ni Governor Matthew Marcosa-Manotoc ti panagoperar dagiti galyeraan ditoy probinsya.
Nupay kasta, kuna ti bise mayor a saan pay laeng a 100 a porsiento a maisubli ti operasyon amin a galyeraan gapu ta maysa laeng iti kada ili wenno ciudad.
Innayon na a limitado laeng ti bilang dagiti mapalubusan a sumrek iti galyeraan ken no agpusta dagiti maseknan ket masapol nga idalan da iti Gcash.
Mainaig iti daytoy, inpakaammo ni Chua a basar iti obserbasyon na iti E-sabong ket adda dagiti madi nga epekto na gapu ta 24 nga oras ti operasyon na no sadinno ket awan ti pannaka-regulate daytoy isut gapuna nga ado dagiti naigamer. Innayon na a mamati nga ado latta dagiti mangayat a mapan iti mismo a galyeraan gapu ta kayat da a makita a personal dagiti manok da a lumaban.
