LAOAG CITY – Inpakaammo ni Marsha Lou Wafan, mangidadaulo ti Laoag City General Hospital a saan a ma-avail-an ti antivenom vaccine.
Segun kenkuana, masapol nga adda ti request letter iti Research Institute for Tropical Medicine ken makita ti situasion iti lugar maipanggep iti pannakakagat ti uleg.
Inbatadna a nagsuratda iti Research Institute for Tropical Medicine tapno maikkan ti suplay iti nasao nga ospital ita a tawen.
Inlawlawagna a daytoy a gagem ket kalpasan a kiniddaw ni Sangguniang Panlungsod Member Jason Perera a masapol nga adda ti suplay ti antivenom vaccine kalpasan nga adda dagiti insidente iti pannakakagat ti uleg ditoy siudad ti Laoag kadagiti naglabas a tawen.
Iti agdama, maiyur-uray laengen ti pannakai-deliver ti nasao a bakuna ditoy siudad ti Laoag gapu ta aggapu pay daytoy iti ballasiw-taaw.
Immuna iti daytoy, kwinestionaran ni Vice Mayor Rey Carlos Fariñas ni Dr. Wafan no apay awan ti nailatang a pundo para iti antivenom vaccine para inton sumaruno a tawen.
