LAOAG CITY – Nangidiaya ni Vice Mayor Carlos Fariñas ti maysa a coster para kadagiti estudiante ti Rodolfo CG Fariñas Jr. National Science High School iti Brgy. Vira ditoy siudad ti Laoag a marigatan iti transportasion gapu iti kinaadayo ti pagadalan.
Segun ken ni Fariñas, daytoy ket kalpasan a nagkiddaw ti tulong ti Principal ti nasao a pagadalan pakairamanan ni Dr. Joann Corpuz, Schools Division Superintendent ti Department of Education ditoy siudad ti Laoag maipanggep iti problema dagiti maseknan nga agad-adal.
Inbatadna a babaen iti daytoy ket saanen a problema dagiti estudiante ken dagiti mangisursuro ti pagplete ken panaglikos tapno makadanon iti pagadalan.
Inlawlawagna nga iti oras ti 6:40 ti bigat ket tumalawen ti coster iti Fariñas Terminal idinto nga agsubli pay daytoy iti oras ti alas singko ti malem.
Inkarina iti Principal nga ikarigatanna ti agurnong tapno makagatang ti bukud a bus service ti nasao a pagadalan.
Innayonna nga iti agdama ket isuna ti mangibakbaklay ti gastosen ti coster a mangitultulod kadagiti maseknan nga estudiante ti Rodolfo CG Fariñas Jr. National Science High School.
Kabayatanna, naammoan a nangrugi ti pannakaipatungpal ti panangitulod ti coaster kadagiti estudiante idi Lunes, Agosto 12.
