LAOAG CITY – Inpetteng ni Vice Mayor Vicentito Lazo a ni Mayor Michael Marcos-Keon ti nangaprubar ti baro a Traffic and Order Code ditoy ciudad ti Laoag.
Maipalagip a naiget ti panangkondenar dagiti tricycle drivers ditoy ciudad ti Laoag iti pannakaipasa daytoy a paglintegan iti kangitingitan ti covid-19 pandemic.
Inpalgak ti bise mayor a saanna a basol ti pannakaipangato ti multa dagiti aglabsing ti linteg trapiko gapu ta saan nga isuna ti nangaprubar iti daytoy no di ket ni Mayor Keon.
Innayon na a ti Traffic and Order Code ket inisponsoran ni Konsehal Edison Bonoan ken inaprubaran dagiti 12 a kameng ti konseho.
Mainaig iti daytoy, inbatad ni Lazo nga agatendar man wenno saan dagiti presidente ti Tricycle Operators and Drivers’ Association (TODA) intono Nobyembre 27 iti oras ti alas-8:30 ti bigat ket maituloy latta ti public hearing basta kompleto dagiti kameng ti komite a mangtaming iti daytoy a banag.
