LAOAG CITY – Nagsinnungbat da Vice Mayor Vicentito Lazo ken ni Sang Panlungsod Member RJ Fariñas kabayatan ti sesyon ti konseho ditoy ciudad ti Laoag.
Daytoy ket mainaig iti Medical Assistance for Indigent Person (MAIP) manipod iti Department of Health (DOH) ket maipan iti Laoag City General Hospital (LCGH).
Immunan a naidasar daytoy a banag iti konseho ngem naidefer gapu ta kwinestyunaran dagiti maseknan no apay a nagsisina dagiti tallo a resolusyon maipanggep iti MAIT nga agpapan ita ket awan pay ti committee report na.
Nangrugi ti panagsinnungbat dagiti dua kalpasan nga inlungalong ni Fariñas a masapol a trataren dan ti tallo a resolusyon tapnu adda sigud a maited a tulong pinansyal kadagiti agkasapulan nangruna iti agdama a pandemya, ngem inpetteng ni Lazo a saan a naka-calendar dagitoy.
Nupay kasta, immanamong ti kaadoan a kameng ti konseho nga uray saan a naka-calendar ti tallo a resolusyon ket kasapulan a matrataren.
Kalpasan ti sumagmamano a diskusyon ket immanugot met laeng ti bise mayor a nangtratar kadagiti nasao a resolusyon.
Kabayatan ti pannakatratar dagiti resolusyon ket adda ti naamendaran no sadinno a saanen a kasapulan nga adda ti surat manipod iti siasinno man nga opisyal sakbay a makaala ti tulong dagiti umili no di ket agderetso da lattan iti nasao nga ospital.
