LAOAG CITY – Kwinestyunaran ni Vice Mayor Vicentito Lazo ditoy ciudad ti Laoag ti tilt table nga idonar ti Department of Health (DOH) para iti Laoag City General Hospital (LCGH) gapu ta awan ti brand na ken saan a nailawlawag no ania ti pakausaran na.
Inlawlawag ni Lazo a masapol nga amin a maidonar a banag iti gobierno ket adda ti brand wenno model na gapu ta isu ti umuna a kitaen iti deed of donation.
Kuna na a pagsasaritaan danto daytoy a banag iti sumaruno a sesyon da iti konseho ditoy ciudad ti Laoag iti umay a lawas.
Innayon na nga imbitaran danto ni Doctor Marsha Wafan tapnu ilawlawag na no ania ti pakausaran ti tilt table, apay awan ti brand na ken no mano ti magastos ti ciudad a mangoperar iti daytoy.
