LAOAG CITY – Inbatad ni Vice Mayor Vicentito Lazo ditoy ciudad ti Laoag a possible a saan pay a nalukatan ti opisina ni dati a City Treasurer Elena Asuncion no saan nga isuda ti nagtugaw.
Inbaga ni Lazo a nagsurat da iti Commission on Audit (COA) ken Bureau of Local Government Finance para iti pannakalukat ti nasao nga opisina.
Inpasingked ti bise mayor a saan a makaapektar ti pannakalukat ti nasao nga opisina iti manarimaan nga imbestigasyon ti Anti-Fraud Division ti COA gapu iti panagpukaw ti 85.4-milyon a pisos a pondo ti gobierno lokal ditoy ciudad ti Laoag.
Innayon na a makatulong pay daytoy iti imbestigasyon gapu ta adda dagiti nakita a xerox time deposit slip.
Immunan a nalukatan ti maysa a volt iti opisina ti dati a treasurer ngem awan ti karga na ken adda pay ti dua a volt a nagtalinaed a nakarikep gapu ta iyuray da ti eksperto a manglukat tapno saan a maperdi.
Mainaig iti daytoy, patien ni Lazo a saan laeng a ni Asuncion ti akin-aramid ti panagpukaw ti 85.4-milyon a pisos a pondo ti ciudad no di ket adda pay dagiti dadduma a kakadwa na.
Inbaga na a no kaspagarigan agpila ti reklamo ket saan laeng a ni Asuncion no di ket mairaman pay ti internal auditor iti dayta a ni City Accountant Edgar Pascual, dagiti agpapaay iti COA a nag-audit kasta met dagiti chief executive idi panawen a nagpukaw ti nasao a pondo.
Inpetteng na a responsibilidad dagiti maseknan a bantayan ken kitaen nga amin a sanikua ti LGU ket maprotehiran.
Kwinestyunaran pay ni Lazo ni Pascual no apay nga awan ti inaramid na ken saan a nagtignay a dagus tapno saan koma a nakalibas ni Asuncion gapu ta rumrumuar a naduktalan na nga adda ti mapukpukaw a pondo iti bolan pay laeng ti pebrero idinto nga hunyo a nagpukaw ti dati a treasurer.
