LAOAG CITY – Maalarma ni Vice Mayor Rey Carlos Fariñas kadagiti mapaspasamak a maanomalya a pannakabusbos ken panagpukaw ti pundo ti barangay ditoy siudad ti Laoag.
Inbatadna nga arig masansanen daytoy a mapaspasamak kadagiti sumagmamano a barangay ditoy siudad.
Inlawlawagna nga iti kaso iti Barangay Cataban ditoy siudad ti Laoag ket masdaaw apaman a nangngegna ti sungbat ti Kapitan nga adalenna pay laeng no kasoanna wenno saan ti Barangay Treasurer a maipagarup a nangala ti 256 a ribu a pisos manipud iti pundo ti barangay.
Mamati ti Bise Mayor nga agtultuloy nga agraira daytoy a pasamak no saan a maipataw ti maiyannatop a kaibatogan ti naaramidda ken saan a maareglo.
Mainaig iti daytoy, inyendorsona daytoy a banag iti Committee on Good Governance and Barangay Affairs tapno adalen no adda dagiti banag a mabalin a maipasa kas maysa a linteg tapno mapaigetan ti pannakairuar ti kuarta kas kadagiti nayon a dokumento tapno masigurado nga umno ti pannakairuar ti kuarta iti bangko ken maliklikan ti anomalya.
Maipalagip nga adda dagiti sumagmamano a kaso a naipadanon ditoy Bombo Radyo Laoag iti kallabes no sadinno nga iti Barangay San Mateo ket maipagarup a nalablabes ngem iti naaprobaran a pundo ti konseho ti nausar a pinanggatang ti janitorial supply idinto nga iti Barangay Cataban ket maipagarup nga adda ti 256 a ribu a pisos nga in-inot nga inruar ti Barangay Treasurer babaen ti maipagarup a panangpekena ti pirma ti Kapitan.
