LAOAG CITY – Nasakit ti nakem ni John Michael Bautista, maysa kadagiti volleyball player kalpasan a maipagarup nga awan ti napan nagresponde kenkuana a medics uray nabullo ti tumengna kabayatan ti panagay-ayamda ti volleyball.
Segun kenkuana, manarimaan ti panagay-ayamda idi a kellaat a nagdinnalapusda ti kaduana nga umaayam a nangitunda ti pannakabullo ti sakana.
Gapu iti daytoy, kunana a napaidda pay iti uneg ti court gapu iti sakit a nariknana agingga nga inpaigidda laeng isuna nga awan man laeng ti nangtaming kenkuana.
Nupay kasta, adda ti maysa a pagayamna ti immay nangtulong kenkuana tapno mapan iti Rural Health Unit para iti naan-anay a pannakatamingna.
Inlawlawagna nga immunada a tinawagan ti Rural Health Unit tapno mangipatulod ti medics ngem ti nagbalin a sungbatda kenkuana ket isuna lattan ti dumanonen.
Kunana a saanna a kabaelan ti magna gapu iti ang-angalenna a sakit iti pannakabullo ti sakana isu nga immay met laeng ti sumagmamano a personnel ti Rural Health Unit tapno agasan isuna.
Mainaig iti daytoy, inpakaammona a nangipatulod isuna ti mensahe iti facebook page ti Sangguniang Kabataan iti ili ti Paoay nga isuda ti organizer ti nasao a paay-ayam ngem kinatawaanda laeng ti mensahena.
Naammoan nga iti baet ti napasamak ken ni Bautista ket nagtultuloy ti panangisayangkatda ti panagay-ayam ti volleyball.
Innayonna a nakasagana daytoy a makisarita iti Sangguniang Kabataan maipanggep iti daytoy a banag.
