LAOAG CITY – Inbatad ni Vice President Sara Duterte a saanen a nasurpresa iti plano a panangipila manen ti impeachment complaint kontra kenkuana.
Inpetteng ti bise presidente a ti nasao nga addang ket maipagarop a maus-usar kas “bargaining chip” ti sumagmamano nga agpanpanday linteg sakbay a maipasa ti 2026 national budget.
Reaksyon daytoy ni Duterte kalpasan nga inwaragawag ti militant coalitiona Bagong Alyansang Makabayan (BAYAN) nga isagsagana da ti sabali nga impeachment complaint kontra kenkuana apaman nga agngudo ti one-year ban intono Pebrero 5, 2026.
Inpetteng na a kanayun nakasagan a mangsungbat kadagiti alegasyon kenkuana, ngem saan a mabalin nga agulimek no makita na a kabayatan ti pannakaiproseso ti impeachment ket mabalbaliktad tapno maiturong iti raket a nakatutuk iti budget.
Segun iti bise presidente, ti panangibutaktak ti sumagmamano nga agpanpanday linteg maipanggep iti reklamo ti impeachment nga immunan a naipila kontra kenkuana ket nangipakita a ti addang ket saan a nagutigot ti prinsipyo no di ket presyo.
