LAOAG CITY – Inpasigurado ni Vice President Sara Duterte a sagsaganaanen dagiti abugadona ti maikadua nga impeachment case a mabalin nga ipila kontra kenkuana kalpasan ti Pebrero 6.
Daytoy ket kalpasan nga inbasura ti Korte Suprema nga addaan ti finality ti immuna nga impeachment case nga inpila kontra iti Bise Presidente.
Segun iti Bise Presidente, sakbay pay a nag-Christmas break iti napalabas a tawen ket tinalantanen dagiti abugadona dagiti panagsagsagana nga aramiden para iti sabali manen nga impeachment a mabalin a maipila kontra kenkuana.
Inlawlawagna a ninamnamadan ti panang-impeach wenno panangpadisi kenkuana iti puesto ken posible nga agtultuloy iti kada tawen agingga a malpas ti terminona.
Inadmitir ti Bise Presidente a likliklikanna a mapagsaritaan ti impeachment no bumisbisita isuna iti amana a ni dati a Presidente Rodrigo Duterte nga agdama a nakabalud iti International Criminal Court (ICC) idiay The Hague.
